A Giuseppina Mira il Premio Speciale “Pirandello”2011
Nell’ambito del concorso poetico letterario”Una poesia per Pirandello” a Giuseppina Mira è stato assegnato il premio speciale per la poesia in lingua siciliana “L’ALLERGIA”. La manifestazione si è svolta il 23 agosto al Caos, presso la casa natale di Pirandello, alla presenza di poeti giunti da ogni parte d’Italia e anche dall’estero. Tra gli organizzatori della manifestazione Mario Gaziano, Liliana Arrigo, Enzo Alessi, Maria Grazia Castellano.
L’ALLERGIA
Un iornu Vartuliddu dissi:
- Haiu n’allergia!
- E Giurlanniddu c’arrispunnì:
- È di moda, nun t’artariari!
- Iu mmeci sugnu assà artariatu, propriu arrabbiatu!
- Ma ha aviri pazienza! Chi cci vò fari?
- Iu mmeci tanti cosi vulissi fari!
- Adà, l’ha capiri ca nun pò strafari.
- E pirchì iu no e l’atri sì?
- Nenti cci staiu capennu. Ma chi vò diri, Vartulì?
- Pirchì iu ha fari sempri cchiù di lu me duviri, Giurlannì,
e c’è mmeci cu fa sulu chiddu ca cci pari e piaci?
Pirchì iu ha fari sulu acchianati
e ha arrancari comu un sciccareddu
e c’è cu fa sulu scinnuti
e curri comu un cavadduzzu?
A stu puntu Giurlanniddu dissi:
- Ma chi cci nni ntraponi tuttu chistu cu la to allergia?
E Vartuliddu c’arrispunnì:
- Cci ntraponi e comu!
Iu sugnu allergicu a cu s’arricchisci a li me spaddi
anzi a li nostri spaddi e nn’arridduci sulu a peddi e ossa
sugnu allergicu a cu nni duna feli
mentri pi iddi c’è sulu meli.
Lu capisti, Giurlannì, chi allergia haiu?
- Lu capivu, Vartulì, ca nun c’è di stari in allegria
e ti cunfessu ca puru iu sugnu allergicu a li mbrogli,
a li ngiustizi, a li cosi torti.
- Allura si d’accordu cu mia quannu dicu
ca nni fannu passari tanti guai
ca nni fannu acchianari lu sangu a l’occhi
ca nn’arridducinu cu li vudedda sbutati.
- Gnia certu ca la pensu comu a tia!
Nun si nni pò cchiù di aviri li sacchetti spirtusati.
Natri nun avemu sordi pi mangiari
iddi mmeci hannu sordi di ittari.
Natri senza travagliu, a spassu
pi iddi mmeci la vita è sulu spassu.
Chi è giustu ca cci sunnu li rraccumannati
ca nni vonnu cuntu e ragiuni di iri avanti
anchi si nun sannu unni mettiri li mani
mmeci natri, ca semu scartati comu pumadoru spatti,
studiamu puru li virguli e li punti? E cu quali risurtatu?
Ca iddi mettinu puntu a la nostra situazioni e vannu a capu.
E po’ ognunu d’iddi si senti un capu
e a natri nni cunsideranu capuna, nni mettinu nni lu saccu
e nni dunanu strattuna.
Accussì propriu nun va
ogni limiti si sarpà.
E la dignità unni sta?
Nun si po’ essiri sempri marpiuni
s’ava iri ncontru a l’amuri
ed essiri tutti uniti comu li ita di la manu
pi stringiri forti la spiranza e nun falla vulari luntanu
tutti uniti comu li petali di li sciuri
pi respirari lu profumu di la solidarietà
tutti uniti comu li culura di la nostra bannera
pi essiri arcubalenu di felicità nni sta nostra società.
Nenti cchiù figli e figliastri
ma tutti figli di la nostra bedda Italia.
Giuseppina Mira
Poesia ispirata dal libro “IL LIMITE” di don Antonio Sciortino - Ed. Laterza
