Poesia letta al MEETING DEI POETI DEL MANDORLO E DELLA NATURA svoltosi al Palacongressi di Agrigento il 13 febbraio 2011.
E FU PRIMAVERA
Era ‘mmernu e fu primavera
quannu vinniru li fati
‘nni la valli di Girgenti.
‘Ncantati di la biddrizza
di li templi
voziru ca la primavera
arrivassi primintia
pi fari di Girgenti la regina
e ficiru spuntari
tanti arbuli di mennuli sciuruti
pi mettiri a li so pedi
un tappetu arricamatu e profumatu.
Po’ la ‘ncurunaru
cu un diadema di stiddri
e la valli di Girgenti
arridiva felici.
Era ‘mmernu e fu primavera
quannu vinniru li fati.
Chi fussi bellu si turnassiru
‘nni sta valli ‘ncantata
pi fari sciuriri lu travagliu
ca canusci sulu lu ‘mmernu
‘mmeci voli canusciri
la primavera.
Giuseppina Mira
