Soffi di Vita

In occasione della festa del Santissimo Crocifisso di Siculiana

Santissimu Crucifissu
Tu soffri assà
pi tuttu lu mali di lu munnu
e mi pari di sentiri
la to Vuci ca dici:
Figli me
nun facitivi sbattuliari di li ’ngiustizi
ca iti a finiri nni li sdirrupi.
Facitivi accarizzari di l’amuri
accussì stati nni li valli sciuruti.
Figli me
ata aviri la forza
di nun farivi arrubbari lu cori
di la mmidia, di la superbia
di l’egoismu, di l’odiu
si nun vuliti pruvari la vrigogna
d’ aviri la vostra armuzza nuda
senza un strazzu d’amuri ca la cummoglia.
Iu sugnu  prontu a pirdunarivi
viniti nni mia
ca v’aspettu cu li vrazza aperti.
Nun lu sapiti
ca sugnu la vostra Paci
ca carma li timpesti
ferma li grannuli
e arrisedi l’acqui agitati?
Nun lu sapiti
ca sugnu la vostra Luci
ca adduma la vita
lu vostru Suli
ca nuddu po astutari?
Pirchì ata stari a lu scuru
si Iu vi fazzu lustru
pi nun farivi allavancari?
Iu sugnu sempri ccà
ca v’aspettu cu li vrazza aperti
curaggiu, viniti, stati cu mia
nun v’addunati comu siti affannati?
Arripusativi a li pedi di la me Cruci
unni putiti capiri quantu vi vogliu beni
a li pedi di la me Cruci
ca po pariri fuddia
ma è ’na fuddia ca fa raggiunari
e riflettiri ca nun s’ava gracciari lu cori
di cu mori pi l’atri
di cu mori pi n’amuri
cchiù granni di lu mari.