L’ARBULI DI LI MENNULI
L’arbuli di li mennuli
s’arrisbiglianu prima di lu tempu
e la valli di Girgenti sciurisci
e cuntenti si spicchìa nni lu cielu
ca addiventa profumatu e allegru.
Lu silenziu s’adduma di stiddi
e la primavera veni a maritari
li culonni grechi sodi e maistusi
cu ’sti deliziusi minnuliddi
ca già hannu ’ntesta veli di sciuri
e sunnu pronti a iri a l’artari.
Chi festa nni la valli di Girgenti!
Dami e cavaleri ca di luntanu vennu
s’annacanu sutta un vintagliu azzurru
cu ’na musica ca l’arma accarizza
e arricama di favuli li pinseri.
Pari ca la timpesta mai avissi a veniri ccà
mmeci tanti voti nni ’sta terra ’ncantata
scinni la neglia di li ’ngiustizii
e lu scuru di la morti.
Ma natri Siciliani vulemu ’na vita ca luci a lu suli
cumu li culonni grechi
e arridi a tutti
comu li mennuli sciuruti.
Si li culonni di li templi avi seculi
ca stannu a guardia di ’stu paradisu
è pi dirinni di essiri liuna
e nun fari avvicinari li ieni.
Si li mennuli s’arrisbiglianu
prima di lu tempu
è pi dirinni d’apriri l’occhi
prima ca lu mali fa lu so tempu
e nn’arridduci a cinniri.
Chi focu nni li vini
è ’sta Sagra di li mennuli sciuruti!
